لسه برده عايزة ترضي الناس وتغضبي ربنا ؟؟؟؟؟
أختي الغالية ..
إنتي عارفة لو اجتهدتي في رضا ربنا وربنا رضي عنك وأحبك ،
عارفة إيه اللي هيحصل ؟؟
ربنا هيحبب الناس فيكي ..
قال رسول الله صلى الله عليه وسلم :
( إن الله تبارك وتعالى إذا أحب عبداً نادى جبريل إن الله قد أحب فلاناً فأحبه ، فيحبه جبريل ، ثم ينادي جبريل في السماء إن الله قد أحب فلاناً فأحبوه ، فيحبه أهل السماء ، ويُوضع له القبول في أهل الأرض )
متفق عليه
يعني لو ربنا حبك ، الكون كله هيحبك ، سيدنا جبريل هيحبك ،
وملائكة السماء كلهم هيحبوكي ، وكمان أهل الأرض هيحبوكي ..
عايزة إيه تاني؟؟؟؟؟؟؟
وفي المقابل وعلى العكس تماماً .. قال صلى الله عليه وسلم:
( وإذا أبغض عبداً دعا جبريل فيقول إني أبغض فلاناً فأبغضه ، فيبغضه جبريل ، ثم ينادي في أهل السماء إن الله يبغض فلاناً فأبغضوه ، قال فيبغضونه،ثم يُوضع له البغضاء في الأرض)
يعني لو ربنا أبغضك ، الكون كله هيكرهك ،
ومهما حاولتي تعملي علشان الناس تحبك برده هيكرهوكي !!
خلاص والعياذ بالله وُضِع ليكي البغضاء في الأرض!
ترضي يحصلك كده ؟؟؟؟؟
----------------
وآخر نصيحة هقولهالك في الجزئية دي :
"متديش ودانك للنــــــــــــــــــــاس وكلامهم"
حتى لو إنتي متأكدة مليون % إنك مش هتتأثري بكلامهم ..
ليه بقولك كده ؟؟ لأنهم بيقولوا في الأمثال :
"الزّنّ على الودان أمرّ من السحـــــــــر !!"
وخاصة لما هتكوني في بداية التزامك أو في مرحلة ضعف إيماني ، ممكن أي كلام أو شبهة مهما كانت تافهة تأثر فيكي
؛ بل ممكن تخليكي تنتكسي والعياذ بالله !!فابعدي عن الناس دي ومتسمعيش كلامهم ولا تقعدي في مجالسهم
وحافظي على قلبك وإيمانك..
وإوعي كلام الناس يخليكي مترددة في اتخاذ أي قرار هيقربك من ربنا ، أحسن والعياذ بالله ممكن تكوني كده من
المنافقين !!
أصل التردد ربنا ذكره في صفة المنافقين ..
قال الله : (فهُمْ فِي رَيْبِهِمْ يَتَرَدَّدُونَ) التوبة:45 ..
وقال الله ( مُذَبْذَبِينَ بَيْنَ ذَلِكَ ) النساء:143 ..
فـ سيبك من الناس وكلامهم ، وفرّغي قلبك من طلب رضا الناس ، وخلّي شعار حياتك هو :
((((رضــــا الله قبــــــل كــــل شئ))))
